Die Birmaanse weermag het onlangs die dorpie Hnan Chaung in Chin-staat gebombardeer. Huise is afgebrand, sewe burgerlikes is dood (insluitend twee kinders, 'n ma en 'n baba), en ten minste agt ander is beseer. Gevegte tussen die Arakan-leër, 'n etniese gewapende weerstandsgroep, en die Birmaanse weermag (genaamd die Tatmadaw) was al etlike dae aan die gang met geweervuur en ontploffings. Twee Tatmadaw-stralers het die dorp baie keer gebombardeer en verskeie kerke beskadig. Ook is 'n 53-jarige man gehospitaliseer nadat hy op 'n landmyn getrap het. Tydens die koronaviruspandemie doen menseregte-organisasies en ander 'n beroep op 'n landwye wapenstilstand in Birma, en sê dat almal pogings moet toespits om die virus te beveg en die kwesbares te beskerm, nie om oorloë te veg en burgerlikes dood te maak nie.