Die seun van 'n vermoorde Pakistanse politikus staar doodsdreigemente van Islamiete in die gesig omdat hy 'n gevangene Christenvrou ondersteun het wat ter dood veroordeel is. Menseregte-aktivis Shan Taseer het vandeesweek op Twitter gevra dat mense mev Asia Bibi moet ondersteun. Bibi is ter dood veroordeel, daarvan beskuldig dat sy Islam “beledig” het nadat sy haar Christelike geloof verdedig het. Moslems in Pakistan beskuldig Taseer nou van godslastering teen Islam. Sy pa, Salman Taseer, was 'n Pakistanse politikus wat deur een van sy eie lyfwagte vermoor is omdat hy die land se godslasteringswette in Januarie 2011 teëgestaan het. Shan Taseer se Twitter-rekening kan nie meer gesien word nie, maar twiets met hutsmerke wat hom ondersteun, versprei vanaf verskillende rekeninge .